Barking Heads & Meowing Heads 支持領養!

Barking Heads & Meowing Heads 支持香港人領養寵物,令更多浪浪得以重新感受愛!
寵物並不是一時的衝動喔,若然當天選擇了成為牠們的主人,便是一生的主人了!
喜歡寵物的我們,可以先看看浪浪喔~ 有能力便拯救牠們的弱小心靈吧!!
在這裡分享你的領養故事吧,鼓勵身邊的人,支持領養!

我們香港的領養故事

【💜支持香港地領養
單車守護犬的故事💜】

我是一隻守護主人單車的「流浪犬」,我是番薯。每日在街市路邊,人來人往,但就是不見主人身影。

已經四個月了,朝七晚八守候著主人單車,怎麼主人就是不回來?我有乖乖的等呢…這次我有乖乖聽話呢…

義工看到可憐的小番薯,默默等待不曾出現的主人,實在叫人不忍心。所以義工們都會經過這街市路邊探望番薯。

有次更遇上了當時番薯的主人,義工都紛紛勸他把番薯帶回家。但他卻回應:「你們要,就把牠帶走。」

 


為了番薯著想,義工們只好帶牠離開。

差不多一年的時間了,番薯就找到了一位熱心照顧,愛錫的主人!

番薯主人:在我家7年了,現在萫薯巳经10歳了。希望佢能够健健康康,我就䦕心,希望更多人领養唐狗!

 

【💜支持香港地領養 -
情人節Mojo的故事💜】

我叫Mojo,我在情人節的時候找到了我的終身主人。
在2015年2月14日對於平常人只是一個普通的情人節,而對於Mojo就係轉變一生嘅機會。

Mojo之前係比人唯棄係街到,幸運地被香港拯救貓狗協會 HK Saving Cat And Dog Association的義工拯救。

而百厭嘅Mojo係義工帶去診所做檢查時候係佐敦走甩!!一個小朋友由朝早十點幾一直走走走~ 睇得出非常活潑好動!!最後,被沿途嘅人發現係鐘樓,什至稱Mojo為巨型芝娃娃😂

利厲在於依位百厭仔走到夜晚十點,係尖沙咀中港城先捉到。


而命運嘅紅線連起左剛剛與老公結婚嘅現任主人,當時就係Facebook見到依隻百厭精。但自從返到協會後一直無人問津,可能就係為左遇見依家嘅主人。

主人:Mojo係我同老公剛結婚時領養嘅第一隻毛孩,領養日子剛巧係情人節,佢係我地最好既情人節禮物。

 

【💜支持香港地領養 -
一筒 ‧ 一瞳💜】

小時候嘅我,跟唔上媽媽嘅腳步,迫不得已要同貓媽媽係街上分離。身為流浪貓貓,生存完全唔容易,更何況只係剛出世幾個月嘅貓仔呢?

已經唔記得流浪左幾耐啦…幸運嘅我地遇到一位好心嘅人類帶左我去 香港拯救貓狗協會 HK Saving Cat And Dog Association,收留左我。

佢地叫我做一筒,因為當日救我嘅義工發現我有嚴重嘅流感。右眼被細菌感染,獸醫話我嘅病情已經去到好嚴重,右眼亦有可能會睇唔到野。義工們都對我不離不棄,什至用錢醫好我。雖然到最後我右眼已經睇唔返野,但上天安排我遇上一班熱心愛動物嘅組織,代替貓媽媽保護我。

 


回望返依家嘅我已經4歲啦~ 我被一戶好好嘅家庭收養左,仲同佢屋企嘅汪星人和睦相處。

主人:係2015年嘅10月,因為想為屋企添加一位新成員,一見到一筒就已經好想帶佢返屋企。同時,亦好想幫助到浪流嘅毛孩因而選擇領養。當時我地仍然係一位新手貓奴,亦都有擔心過會否同屋企嘅狗狗相處唔到。但意外地又相處得幾和諧喎佢地!

【💜支持香港地領養 -
一筒 ‧ 一瞳💜】

我叫Mitty,小時候我地三姊妹跟住媽咪在山頭流浪,媽咪因為保護我地,背脊受咗傷,當時正是2016年一個只有幾度,下著雨的寒冬。幸運地,被好心人發現咗,仲帶咗媽咪去睇醫生,之後我地被帶去香港拯救貓狗協會 HK Saving Cat And Dog Association嘅貓舍,仲幫我地搵有愛心的家庭領養. 

後來我比一個有養貓豐富經驗嘅家庭領養咗,我好開心,以為幸福已經降臨。但因為我本身性格太驚青,所以去到領養家庭嘅第一晚, 叫喊左一整個晚上。第二朝,領養家庭要求義工帶我走, 被退回既原因係無辦法接受我太嘈!! 呢個經驗令我好失望. 雖然協會好努力安排我出席領養日繼續搵愛心家庭,每一次都有人話有意思領養我,但最後都係音信全無。幸福的家對我來講真係奢望嗎 ?

 

一日貓舍再一次將我嘅領養資訊放上Facebook,同日我終於遇上咗我嘅真正主人。媽媽已經同我生活左四年多,我不單享受緊媽媽無微不致既愛, 而且仲多了一個同我好似樣既貓咪做我弟弟。回想, 由返到屋企嘅第一日,媽媽就同我講,將來無論發生咩事,都一定唔會棄養我,會照顧我一生一世。我既幸福就從此開始.

Mitty主人Angela:十四年前,從寵物店買了一隻名種貓,一直照顧佢到終老。期間從媒體資訊上,得知繁殖場對待動物既實況,開始意識到以領養代替購買既重要意義。後來我家老貓因重病離開了,愛寵離開既打擊真係好大, 所以自己對將來是否會重新養貓都未能立定主意。後來因為一張流浪貓的照片,改變左我既想法,決定將對之前離世愛寵的愛延續下去.

 

於是我去貓舍參觀,被一個可愛既小朋友吸引,打算比個家佢,但因為考慮咗兩日既時間,已經被人申請了。到第二朝返工前,見到Mitty被領養又被退回既消息在Facebook出現,當時好嬲,感覺動物生命不被尊重。我決定申請領養佢. 領養那天我向Mitty承諾,無論發生咩事,亦絕不會棄養你,因為你弱小心靈不能再次受傷害。

記得當時我刻意選擇放假前一天帶佢回家,就算如果Mitty回家嘅第一晚唔習慣或太驚,我都可以整晚陪住佢,安撫佢。
今日回想,帶Mitty返到屋企既第一個晚上好深記憶,當晚我感覺人生可以好有意義,好美好。
領養 = 拯救生命,一個小生命就是因為你的決定,而被改寫了一生。

給牠一個家,一份愛,一個一生一世的承諾。亦係給予尋家既流浪動物一份希望。

【💜支持香港地領養 - 迂回曲折搵主人嘅 奶茶💜】



2015年12月29日,一位元朗街坊晚上在垃圾站遇上奶茶,當時奶茶大概三個月大。無助地望着眼前呼喚自己的人, 牠立下決心不再放過機會, 

一直尾隨這個陌生人歸家, 因為牠確實需要一個家!!無奈街坊雖然同為愛狗之人,可惜因為家中已經有四隻狗狗實在收容不下。



還好, 遇上鄰居葉小姐,她二話不說就幫助照顧, 先安頓一晚,
然後再幫奶茶尋找主人或找人領養!

第二天 立即行動在網上出貼文,,可惜一直無得到回應。

後來終於覓得一個家庭收養,但好景不常, 新主人養了兩年後卻因為要搬遷,而新居不能飼養動物。

在無辨法之下,奶茶再一次被遺棄,回到葉小姐身邊。2017年12月28日,葉小姐一隻18歲貓主子剛剛往彩虹橋去。湊巧的是奶茶第二次被遺棄正正是同一日。

 

這一天, 奶茶被帶回到葉小姐身邊. 

難道緣份早已牽絆着奶茶跟葉小姐?

難道兩年前貓主子與奶茶有個約定?

難道貓主子要奶茶好好代替自己倍伴葉小姐?

不論原因是甚麼,現在都是大團圓結局, 葉小姐已經由貓奴轉職為汪奴!奶茶亦升格為汪主子了❤❤

葉小姐:起初都想再幫佢尋找新主人,但相處耐左,實在唔捨得。而唐狗天性董事,  特別是曾經被遺棄過 流落街頭的, 更加乖巧懂性。最後奶茶就進入我家成為我第四個寳貝女!

【我有故事分享】

Close Menu